តេរ៉ាស្តូរី (Terrastories): ឧបករណ៍សម្រាប់ការនិទានរឿងតាមទីកន្លែង

តើ តេរ៉ាស្តូរី (Terrastories) ជាអ្វី?

តេរ៉ាស្តូរី (Terrastories) គឺជាកម្មវិធីសម្រាប់សហគមន៍បង្កើតផែនទីនៃទីតាំងរបស់គាត់ ការពារ​ទឹកដី​នោះ និង​ចែក​រំលែក​រឿងរ៉ាវ​នានា​អំពីទឹកដីនោះ។

កម្មវិធីនេះអាចប្រើប្រាស់បានទាំងអត្តបុគ្គល ទាំងសហគមន៍ ដែលចង់ភ្ជាប់ឯកសារជាសំឡេងឬជាវីដេអូ ទៅនឹង​ផែនទី។ កម្មវិធីនេះត្រូវបានរចនាឡើងតាមរបៀបដែលផ្តល់ភាពងាយស្រួលនិងភាពរីករាយដល់អ្នកប្រើប្រាស់ ដែល​សូម្បីតែ​​សមាជិក​​សហគមន៍​​ដែល​​មិនចេះ​បច្ចេកវិទ្យា​សោះក៏អាច​ប្រើបាន។

តេរ៉ាស្តូរី ចាប់ផ្តើមនៅពេលដែលអ្នកជំនាញផែនទីមួយក្រុម និងអ្នកជំនាញបច្ចេកវិទ្យាមួយក្រុម សម្រេចចិត្ត​ថានឹង​បង្កើត​កម្មវិធី Terrastories ដើម្បី​ជួយ​សហគមន៍​មួយនៅ​អាមេរិក​ខាងត្បូង​ កត់ត្រា​រឿងរ៉ាវ​ប្រវត្តិសាស្ត្រ​អំពី​ទីកន្លែង​របស់​គាត់។ សហគមន៍ ម៉ាតាវ៉ៃ ម៉ារូន (Matawai Maroons) នៅប្រទេស ស៊ូរីណាម (Suriname) ជា​សហគមន៍​ជនជាតិ​អាហ្វិក​ដែល​បាន​រំដោះ​ខ្លួន​ពី​ទាសភាព និង​រត់ភៀសខ្លួន​ទៅ​រស់នៅ​​ក្នុងព្រៃ​តកូនតចៅអស់​រយៈពេល​ជាង​បី​សតវត្សរ៍​មកហើយ និង​បន្តរស់នៅ​កន្លែង​ដដែល​រហូត​ដល់បច្ចុប្បន្ន។ សហគមន៍ ម៉ាតាវ៉ៃ ម៉ារូន មានបំណង​ចងក្រង​រឿងរ៉ាវ​ផ្ទាល់មាត់​អំពី​បុព្វបុរស​ដំបូង​របស់​ខ្លួន​ដែល​បាន​មកដល់​ទឹកដីនេះ។ មេកន្រ្ទាញរបស់សហគមន៍ចង់បានឧបករណ៍មួយដែលជួយកូនចៅជំនាន់ក្រោយយល់ដឹងអំពីទីកន្លែងដែលពួកគាត់រស់នៅ យល់ពីប្រវត្តិសាស្រ្តនិងវប្បធម៌ និងយល់អំពីសមាជិកសហគមន៍ជានរណា។

តេរ៉ាស្តូរី ត្រូវបានបង្កើតឡើងដើម្បីឆ្លើយតបទៅនឹងតម្រូវការនោះ។ ស្របពេលជាមួយគ្នាដែរ ក្រុមការងារ​ក៏បាន​ឮ​អំពី​តម្រូវការ​ស្រដៀងគ្នា​នេះ​ពី​សហគមន៍​ផ្សេងទៀត​នៅ​ជុំរិញ​សកលលោក។

មូលហេតុដែលអ្នកគួរតែប្រើប្រាស់ តេរ៉ាស្តូរី (Terrastories)

ប្រសិនបើអ្នកមានផែនទីនៃតំបន់ដែលអ្នករស់នៅ ហើយ​អ្នក​ចង់​បញ្ចូល​រឿងរ៉ាវ​ផ្ទាល់មាត់​ទាក់ទង​នឹង​តំបន់នោះ តេរ៉ាស្តូរី គឺជាឧបករណ៍ដែលអ្នកត្រូវការ។ ម្យ៉ាងទៀត ដោយសារ តេរ៉ាស្តូរី គឺជាកម្មវិធីគ្រប់គ្រងប្រព័ន្ធព័ត៌មានដែលបន្ថែមពីលើផែនទី វាក៏អាច​ប្រើប្រាស់​សម្រាប់​កត់ត្រា​​ព័ត៌មាន​ណាមួយ​ដែល​មាន​ទំនាក់ទំន​ងជាមួយ​ទីកន្លែង​បានដែរ។

ខាងក្រោមនេះគឺជាមុខងារបន្ថែមមួយចំនួនដែលបញ្ជាក់ពីលក្ខណៈពិសេសរបស់កម្មវិធី តេរ៉ាស្តូរី

1. Interactive user interface

តេរ៉ាស្តូរី ត្រូវបាន​បង្កើត​ឡើង​ជាពិសេស​សម្រាប់​យុវវ័យ​នៃ​សហគមន៍​អ្នក​ការពារ​ផែនដី។ វា​ត្រូវបាន​រចនា​ឡើង​ក្នុង​គោលបំណង​ផ្តល់​ចំណេះដឹង​អំពីទឹកដី អំពី​ប្រវត្តិសាស្រ្ត​និង​វប្បធម៌ ហើយ​ក៏​ផ្តល់​ភាពរីករាយ​និង​ជក់ចិត្ត​នៅពេល​ប្រើប្រាស់​កម្មវិធី​នេះ។ គ្រូបង្រៀនអាចប្រើប្រាស់កម្មវិធី តេរ៉ាស្តូរី ជាផ្នែកមួយនៃកម្មវិធីសិក្សា ដើម្បី​ឲ្យ​យុវជន​មាន​ចំណេះដឹង​មូលដ្ឋាន​ក្នុងការ​ប្រើប្រាស់​កុំព្យូទ័រ ហើយ​ក្នុងពេល​ជាមួយគ្នានោះ​ស្វែងយល់​អំពី​សហគមន៍​របស់​ខ្លួន។

2. មានភាពឯកជន និង មានការចែករំលែក

សុវត្ថិភាព​នៃ​ទិន្នន័យ​គឺជា​ការ​បារម្ភ​ចម្បង​របស់​សហគមន៍​ការពារ​ផែនដី។​វាអាស្រ័យទៅលើតម្រូវការរបស់អ្នក អ្នកប្រហែលជាមិនចង់ឲ្យផែនទីរបស់អ្នកទាំងមូល​ឬ​ផ្នែក​ណាមួយ ធ្លាក់ទៅ​ក្នុង​ដៃ​មនុស្ស​ដែលមិនគប្បីនោះឡើយ។​តេរ៉ាស្តូរី ត្រូវបានបង្កើតឡើងដោយភ្ជាប់ជាមួយនឹងកង្វល់​នេះ ដូច្នេះ​កម្មវិធី​នេះ​មាន​មុខងារ​មួយ​ដែល​អនុញ្ញាត​ឲ្យ​សហគមន៍​អាច​កំណត់​ថា​រឿង​ណាមួយ​ជា​រឿង​ឯកជន និង​អាច​កំហិតល័ក្ខខ័ណ្ឌ​សម្រាប់​អ្នក​ចូលមើល។ នេះមានន័យថា​ អ្នកត្រូវមាន log-in ដើម្បីអាចចូលអានរឿងទាំងនោះបាន។ ផ្ទុយទៅវិញ មានរឿងខ្លះដែលសហគមន៍ចង់ចែករំលែកជាមួយពិភពលោក និង​អាច​កំណត់​មុខងារ​ថា​អ្នកណា​ក៏អាច​មើលបានដែរ។

3. តេរ៉ាស្តូរី ដំណើរការដោយមិនត្រូវការសេវាអ៊ីនធ័រនែត

សហគមន៍​អ្នក​ការពារ​ផែនដី​ជាច្រើន​តាំង​ទីលំនៅ​នៅ​តំបន់​ជនបទ​ដាច់ស្រយាល ដែលមិនមានសេវាអ៊ីនធ័រនែត។ ជាអកុសល ឧបករណ៍សម្រាប់​កត់ត្រា​រឿងរ៉ាវ​និង​ផែនទី​មួយចំនួន​មិនអាច ឬស្ទើរតែមិនអាច ​ដំណើរការ​បាន​ដោយ​មិនមាន​សេវាអ៊ីនធ័រនែត។ ដោយសារតែមូលហេតុនេះហើយ ទើបកម្មវិធី តេរ៉ាស្តូរី ត្រូវបាន​បង្កើត​ឡើង​ឲ្យ​ដំណើរការ​ដោយ​មិន​ចាំបាច់​​មាន​សេវា​អ៊ីនធ័រនែត។ កម្មវិធីទាំងមូលអាចដំណើរការនៅលើកុំព្យូទ័រ​ ឬឧបករណ៍អេឡិចត្រូនិកណាមួយ ដែល​អាច​ភ្ជាប់​ជាមួយ​ឧបករណ៍​ផ្សេងទៀត​ដោយ​មិនចាំបាច់​មាន​សេវា​អ៊ីនធ័រនែត។ មុខងារនេះទទួលបានការពេញចិត្តពីសហគមន៍មួយចំនួន ដោយសារថា ផែនទី​និង​រឿងរ៉ាវ​ដែល​ពួកគាត់​បាន​កត់ត្រា នឹង​មិន​បែកធ្លាយ​ទៅ​ក្រៅពី​រង្វង់​សហគមន៍​របស់គាត់។

4. អាចផ្លាស់ប្តូរបានតាមចិត្តចង់

នៅក្នុងកម្មវិធី តេរ៉ាស្តូរី (Terrastories app) អ្នកអាចផ្លាស់ប្តូរភាសា ផែនទី ឬ​ព័ត៌មាន​ដែល​អ្នក​បានកត់ត្រា តាមចិត្តអ្នកចង់។ នៅពេលដែលអ្នក download កម្មវិធី វាមកជាមួយផែនទីពិភពលោកមួយ ប៉ុន្តែ​អ្នក​អាច​ជ្រើសរើស​យក​ការ​ប្រើប្រាស់​ផែនទី​របស់អ្នក រួមទាំង​ផែនទី​ដែល​ដំណើរការ​ដោយ​មិនត្រូវការ​សេវាអ៊ីនធ័រនែត។ អ្នកក៏អាចបកប្រែកម្មវិធី តេរ៉ាស្តូរី​ ទៅជាភាសារបស់អ្នក និង​អាច​កំណត់​មុខងារ​បែងចែក​រឿង​ទៅតាម​ប្រភេទ​ដែល​ឆ្លុះបញ្ចាំង​ទីតាំង​របស់អ្នក។

Photo credit: Amit Madheshiya

វិធីប្រើកម្មវិធី តេរ៉ាស្តូរី

តេរ៉ាស្តូរី រួមមានទាំងផែនទីប្រភេទ interactive និងរឿងរ៉ាវដែលភ្ជាប់ជាមួយផែនទីនោះ។

តម្លើងកម្មវិធី តេរ៉ាស្តូរី

តម្លើងកម្មវិធី តេរ៉ាស្តូរី: កម្មវិធី តេរ៉ាស្តូរី អាច loads នៅលើ browser ប៉ុន្តែយើងអាចតម្លើង​កម្មវិធីនេះ​នៅលើ​កុំព្យូទ័រ ដើម្បី​អាច​ប្រើប្រាស់​វា​បាន​ដោយ​មិនចាំបាច់​មាន​សេវាអ៊ីនធ័រនែត។ យើងក៏អាចរៀបចំកុំព្យូទ័រតូចមួយឲ្យដើរតួជា local hub ដែលផ្តល់កម្មវិធី តេរ៉ាស្តូរី ទៅឲ្យ​កុំព្យូទ័រ​ផ្សេងទៀត​ដែល​បាន​ភ្ជាប់​បណ្តាញ​ជាមួយគ្នា។ មានការលំបាកបន្តិចបន្តួចក្នុងការតម្លើងកម្មវិធី តេរ៉ាស្តូរី ទៅលើកុំព្យូទ័ររបស់អ្នក មិនដូច​កម្មវិធី​ផ្សេងទៀត​ដែល​អ្នក​គ្រាន់តែ download ហើយ​ក៏​អាច​ប្រើ​បាន​នោះទេ។ ក៏ប៉ុន្តែ អ្នក​ឆ្លងកាត់​ការលំបាក​នេះ​តែមួយដងប៉ុណ្ណោះ ហើយ​យើង​ក៏មាន​សេចក្តីណែនាំ​លម្អិតសម្រាប់​លោកអ្នកដែរ។ អ្នកក៏អាចស្នើសុំជំនួយក្នុងការតម្លើងកម្មវិធី តេរ៉ាស្តូរី តាមរយៈបន្ទប់ពិភាក្សារបស់ Earth Defenders Toolkit forum ផងដែរ។ សម្រាប់​ព័ត៌មានបន្ថែមអំពីការតម្លើងកម្មវិធី តេរ៉ាស្តូរី សូមចុច ទីនេះ

បង្កើតសហគមន៍

បន្ទាប់ពីបានតម្លើងកម្មវិធី តេរ៉ាស្តូរី អ្នកអាចបង្កើតសហគមន៍មួយឬច្រើន។ សហគមន៍ គឺជាលំហមួយនៅក្នុង តេរ៉ាស្តូរី ដែលប្រើប្រាស់រួមគ្នាដោយមនុស្សមួយក្រុម។ សហគមន៍​មួយ​មាន​ផែនទី​និង​រឿងរ៉ាវជាច្រើន​អំពីសហគមន៍នោះ។ ជាងនេះទៅទៀត អ្នកអាចបង្កើតមុខងារផ្សេងៗគ្នាឲ្យអ្នកប្រើប្រាស់នៅក្នុងសហគមន៍នោះ​ ឧទាហរណ៍ ផ្តល់តួនាទី​ឲ្យ​នរណាម្នាក់​ជា​អ្នក​ត្រួតពិនិត្យ​និង​កែសម្រួល​រឿងរ៉ាវ​ឬ​ផែនទីជាដើម។ អ្នកក៏អាចទាញយកផែនទីផ្ទាល់ខ្លួនពី Mapbox Studio ឬពី map tile format។ ជាចុងក្រោយ អ្នកអាចបន្ថែមនិមិត្តសញ្ញា ឬរូបភាព background ជាការតុបតែងទំព័រ តេរ៉ាស្តូរី របស់អ្នក។

អាចរុករកមាតិកានៅក្នុងផែនទីឬក្នុងផ្នែករឿងរ៉ាវ

អ្នកប្រើប្រាស់កម្មវិធី តេរ៉ាស្តូរី អាចរុករក​នៅលើ​ផែនទី និងចុចនៅលើ storied place ដើម្បី​ចម្រាញ់​យក​តែ​រឿងរ៉ាវ​ដែល​ទាក់ទង​នឹង​ទីតាំង​ណាមួយ​ជាក់លាក់។ បន្ថែមពីលើនេះ អ្នកមើលអាចចុចលើ រឿងណាមួយ នៅលើ sidebar ពេលនោះ ផែនទី​នៃ​ទីតាំង​នៅ​ក្នុង​រឿងនោះ​នឹងលេចឡើង។​

អាចចម្រាញ់យកតែរឿងនិងទីកន្លែងដែលអ្នកចង់មើល

នឹងមាន dropdown menus ដែល​អនុញ្ញាត​ឲ្យ​អ្នកប្រើ​អាចចម្រាញ់យកតែទីកន្លែងនិងរឿងទៅតាមអ្នកចង់បាន តាមតំបន់ ឬតាម​ចំណាត់ថ្នាក់បែងចែក​របស់​សហគមន៍។ ឧទាហរណ៍: សហគមន៍អាចបង្កើតបញ្ជីរាយនាមទីកន្លែងជាភាសាដើមរបស់សហគមន៍នោះ ដែល​ក្នុង​បញ្ជីនោះ​រួមមាន ការបែងចែក​ទៅតាម​ទីតាំង​ភូមិសាស្រ្ត (ដូចជា ទឹកជ្រោះ កោះ ព្រែកឬស្ទឹង ជាដើម) ឬ​​បែងចែក​​ទៅតាម​ទំនៀម​ទម្លាប់​​របស់​​សហគមន៍​នោះ (ដូចជា ទីសក្ការៈបូជា ឬទីទួលប្រវត្តិសាស្រ្ត)។ សហគមន៍អាចត្រងផែនទីឬរឿងនៅក្នុង តេរ៉ាស្តូរី ដោយផ្អែកតាមការបែងចែកទាំងនេះ។

Setting access permissions for restricted stories

សមាជិកសហគមន៍មួយដែលមានតួនាទីជាអ្នក​ត្រួតពិនិត្យ​រឿង​សម្រាប់ការផ្សាយ អាចកំណត់ថា តើរឿងមួយនេះសម្រាប់អ្នកអានទូទៅ ឬ​សម្រាប់​តែ​សមាជិក​សហគមន៍។ បើអ្នកចង់ដឹងបន្ថែម សូមចុច ទីនេះ។

ការបកប្រែ interface របស់កម្មវិធី តេរ៉ាស្តូរី

បច្ចុប្បន្ននេះ យើងមានកម្មវិធី តេរ៉ាស្តូរី ជា​ភាសាអង់គ្លេស ព័រទុយហ្គាល់ អេស្ប៉ាញ ហូឡង់ ម៉ាតាវ៉ៃ និងជប៉ុន។ អ្នក​ក៏​អាច​បកប្រែ​កម្មវិធី​នេះ​ទៅជា​ភាសាដើម​របស់​អ្នក​បាន​ដែរ។​អ្នកអាចបកប្រែសំណេរនៅក្នុង តេរ៉ាស្តូរី ទៅជាភាសាដើមរបស់អ្នក បន្ទាប់មក បញ្ចូលវាទៅក្នុង language folder របស់កម្មវិធី តេរ៉ាស្តូរី។ បើចង់ដឹងបន្ថែម សូមចុចទីនេះ។

វិធីចាប់ផ្តើម

តើអ្នកចាប់អារម្មណ៍ចង់ប្រើកម្មវិធី តេរ៉ាស្តូរី ដើម្បីកត់ត្រារឿងរ៉ាវផ្ទាល់មាត់មែនទេ? សូមចូលមើល ឧបករណ៍សម្រាប់ការបណ្តុះបណ្តាលនិងសិក្សា, របស់ Indigenous Mapping Workshop. យើងក៏មានកម្មវិធី online Terrastories នៅក្នុង server ដែលក្រុមការងារ តេរ៉ាស្តូរី អាច ជួយអ្នក, ប្រសិនបើអ្នកចង់សាកល្បង។ សូមកុំក្រែងចិត្តក្នុងការ ចូលរួមជាមួយសហគមន៍ អ្នកប្រើកម្មវិធី តេរ៉ាស្តូរី។ យើង​អាច​ជួយ​គ្នា​ទៅវិញ​ទៅមក ជួយភ្ជាប់ទំនាក់ទំនងរវាងគម្រោងផ្សេងៗគ្នា និង​ជួយ​ផ្តល់​យោបល់​ក្នុង​ន័យ​ស្ថាបនា​ដើម្បី​បង្កើន​គុណភាព​និង​ប្រសិទ្ធិភាព​នៃឧបករណ៍របស់យើង។

ឧទាហរណ៍មួយចំនួននៃការប្រើប្រាស់កម្មវិធី តេរ៉ាស្តូរី

ការកត់ត្រាប្រវត្តិសាស្រ្តផ្ទាល់មាត់អំពីដូនតា នៅប្រទេស ស៊ូរីណាម (Suriname)

សហគមន៍ ម៉ាតាវ៉ៃ ម៉ារូន (Matawai Maroons) បង្កើត​ឡើង​ដោយ​ជនជាតិអាហ្វ្រិកដែលបានរត់គេចខ្លួនរួចពីទាសភាព និង​បាន​ប្រយុទ្ធ​ទាមទារ​សិទ្ធិ​រស់នៅ​ក្នុង​តំបន់​ព្រៃស្រោង​មួយ តាំងពី​ជាង​បី​សតវត្សរ៍​មុន។ សហគមន៍​នេះ​បាន​ប្រើប្រាស់​កម្មវិធី តេរ៉ាស្តូរី ដើម្បី​​កត់ត្រា​​ប្រវត្តិសាស្រ្ត​ផ្ទាល់មាត់​នៃ​ទីតាំង​ដំបូង​ដែលបុព្វបុរសរបស់ខ្លួនតាំងពីលំនៅ នៅតាម​បណ្តោយទន្លេ សារ៉ាម៉ាក់កា (Saramacca) នៅប្រទេស ស៊ូរីណាម និងបានប្រើប្រាស់កម្មវិធី តេរ៉ាស្តូរី ដើម្បីភ្ជាប់​រឿងរ៉ាវនានាទៅនឹងទីតាំងជាក់ស្តែងនៅលើផែនទី។  អានបន្ថែម។

ចំណេះដឹងបែបប្រណៃពីអំពីទឹកនៅប្រទេសកាណាដា

ក្រុមជនជាតិ ហូដឺណូសូនី (Haudenosaunee) នៅតំបន់ Six Nations Reserve នៃទីក្រុង អនតារីយ៉ូ ប្រទេសកាណាដា បាននិងកំពុងប្រើប្រាស់កម្មវិធី តេរ៉ាស្តូរី ដើម្បីកត់ត្រា​ចំណេះដឹងបែបប្រពៃណី និងរឿងរ៉ាវរបស់ជនជាតិដើមភាគតិចនៅទន្លេ Grand ជាមួយនឹង​ទិន្នន័យ​វិទ្យាសាស្រ្ត អំពីគុណភាពរបស់ទឹកទន្លេនេះ។ អានបន្ថែម.

លក្ខណៈពិសេស (Specs)

Software ដែលត្រូវតែមាន: កម្មវិធី តេរ៉ាស្តូរី អាចប្រើបានជាមួយ Windows, Mac, Linux, ឬនៅលើ web server. តេរ៉ាស្តូរី គឺជាកម្មវិធីដែលអាចបើកបាននៅក្នុង browser. ខណៈពេលនេះ យើងមិនអាចតម្លើងកម្មវិធី តេរ៉ាស្តូរី នៅលើទូរស័ព្ទដៃបានទេ ក៏ប៉ុន្តែ​យើង​អាច​រៀបចំ​កុំព្យូទ័រ​មួយ​ឲ្យដើរតួនាទីជា​ offline server ដែលអាចចែកចាយសញ្ញា WiFi ដែលទូរស័ព្ទអាចចាប់បាន និងបើកកម្មវិធី តេរ៉ាស្តូរី នៅលើ browser។

សុវត្ថិភាព: ជាមួយកម្មវិធី តេរ៉ាស្តូរី យើងអាចការពារព័ត៌មានរបស់យើង ដោយ​កំហិត​ល័ក្ខខ័ណ្ឌ​​សម្រាប់​តែ​សមាជិកសហគមន៍តែប៉ុណ្ណោះ។ អ្នកអាចកំហិតឲ្យអ្នកអានត្រូវតែ log in ដើម្បីអានរឿងទាំងនោះ ធ្វើដូច្នេះ គ្មាន​អ្នក​ក្រៅ​ណា​អាច​មើលឃើញ​ក្រៅពី​សមាជិកសហគមន៍ឡើយ។

មុខងារសំខាន់ៗ: អាចបំពេញមុខងារពេញលេញដោយមិនត្រូវការសេវាអ៊ីនធ័រនែត។ ផែនទីជាក់ស្តែង រឿងនានាដែលត្រូវបានការពារ (Protected stories) រឿងរ៉ាវដែលត្រូវបានច្រោះរួចហើយ ផ្អែកតាមបញ្ជីររបស់សហគមន៍ ឬតាមអ្នកនិទាន។ អ្នកអាចបញ្ចូលរឿងច្រើននៅលើទីកន្លែងតែមួយ ហើយរឿងមួយក៏អាចនិយាយអំពីទីកន្លែងច្រើន​ដែរ។ រុករកមាតិកាតាមរយៈផែនទីឬតាមរយៈរឿងរ៉ាវនានា។ សហគមន៍ច្រើនអាចប្រើប្រាស់ server តែមួយបាន។ មាន administrative menu ដែលអ្នកប្រើប្រាស់អាចស្នើសុំធ្វើជាអ្នកត្រួតពិនត្យ។

ភាសា: អាចបកប្រែទៅជាច្រើនភាសា។ បច្ចុប្បន្នកម្មវិធីនេះមានជាភាសា ហូឡង់ អង់គ្លេស ជប៉ុន ម៉ាតាវ៉ៃ ព័រទុយហ្គាល់ និងអេស្ប៉ាញ។

Import options: យើងអាច import រឿងរ៉ាវជាចង្កោម​ អ្នកនិទាន និងទីកន្លែង តាមរយៈ administrative menu។

Export options: យើងអាច export ឯកសារនានាចេញពីកម្មវិធី តេរ៉ាស្តូរី ដោយប្រើ command line នៅលើកុំព្យូទ័រ។ Interface សម្រាប់ export ដែលងាយស្រួលសម្រាប់អ្នកប្រើ មាននៅក្នុង administrative menu នៅលើ roadmap។

Media: យើងអាចបន្ថែមរូបថតមួយឬច្រើនទៅលើទីតាំងនានា រឿងនិងអ្នកនិទាន​រឿង សំឡេង​ឬ​វីដេអូ (ច្រើនឬតិចតាមចិត្តអ្នកចង់) ទៅលើរឿងនីមួយៗ.

ក្រុមការងារបង្គោលរបស់ តេរ៉ាស្តូរី សូម​ថ្លែង​អំណរគុណ​ដល់​សហគមន៍ ម៉ាតាវ៉ៃ និងអ្នកផ្សេងទៀត ដែល​បាន​​ចូលរួម​​ចំណែក​​ក្នុងការ​​បង្កើត​​កម្មវិធី​នេះឡើង។

ហេតុអ្វីការនិទានរឿងមានសារៈសំខាន់?

សហគមន៍អ្នកការពារផែនដីជាច្រើន​នៅ​ទូទាំង​សកលលោក​​បង្ហាញ​​ពី​​អារម្មណ៍​ផ្សារភ្ជាប់​ដ៏ជ្រាលជ្រៅ​ជាមួយ​ទឹកដី​ដែល​​ពួកគាត់​រស់នៅ និង​មាន​ឆន្ទៈ​ចង់​ការពារ​ទឹកដីនោះ​ដូចដែល​ដូនតា​របស់គាត់​បានធ្វើ​តៗគ្នា​ច្រើន​ជំនាន់​មកហើយ។ ដើម្បីអាចការពារទឹកដីបាន ពួកគាត់ត្រូវតែមានចំណេះដឹងអំពីទឹកដី វប្បធម៌ទំនៀមទម្លាប់ ប្រវត្តិសាស្រ្ត របស់​ទឹកដី​នោះ ហើយការនិទានរឿងគឺជាវិធីដ៏មានប្រសិទ្ធិភាពបំផុតក្នុងការផ្តល់ចំណេះដឹងនេះដល់សមាជិកសហគមន៍។

ការនិទានរឿងគឺជាវិធីមួយក្នុងបញ្ជូនព័ត៌មានពីជំនាន់មួយទៅជំនាន់មួយទៀត ក៏ប៉ុន្តែអាណានិគម ការកាប់បំផ្លាញ​ព្រៃឈើ និងឥទ្ធិពលនៃវប្បធម៌ដទៃ បាន​ជ្រៀត​ចូល​និង​បំផ្លាញ​ជីវិត​​សហគមន៍ ហើយ​មរតក​រស់​ក៏​រង​ការ​គំរាម​កំហែង។

សហគមន៍នានានៅទូទាំងសកលលោកបានប្រើប្រាស់ និងជំរុញការប្រើប្រាស់ បច្ចេកវិទ្យាសោតទស្សន៍ ដើម្បី​អភិរក្ស​​​រឿងរ៉ាវ​ស្តីអំពី​ជីវិត​ដូនតា​របស់​ពួកគេ។ ការថតសំឡេងគឺជាវិធីសាស្រ្តដ៏ងាយស្រួលនិងមានប្រសិទ្ធិភាពបំផុត ដើម្បីធានាថា រឿងរ៉ាវ​ដ៏មាន​តម្លៃ​នានា​ស្តីអំពី​ទឹកដី ប្រវត្តិសាស្រ្ត និងវប្បធម៌ ត្រូវបាន​អភិរក្ស ដើម្បីសហគមន៍ និងដើម្បី​កូនចៅ​ជំនាន់​ក្រោយៗបានយល់ដឹង។ ការថតវីដេអូអំពីបុគ្គលម្នាក់និទានរឿងណាមួយ យើង​មិនត្រឹមតែ​បាន​កត់ត្រា​ទុក​នូវ​សំឡេង​របស់​បុគ្គលនោះ​ប៉ុណ្ណោះ ទេ ប៉ុន្តែបាន​កត់ត្រាទុក​ទាំង​វិធីសាស្រ្ត​នៃ​ការ​និទានរឿង ទឹកមុខ​និង​កាយវិកា និង​ទីកន្លែង​នៅក្នុង​រឿង​នោះ​ទៀតផង។

ផែនទីក៏ជាវិធីសាស្រ្តដ៏មានឥទ្ធិពលក្នុងការកត់ត្រាចំណេះដឹងផ្នែកវប្បធម៌ដែរ។ ដោយគ្រាន់តែកត់ត្រាឈ្មោះរបស់ទីតាំងនីមួយៗ អ្នកអាចបង្កើតបណ្ណាល័យមួយដែលអភិរក្សវប្បធម៌ប្រពៃណី បរិស្ថាន និងប្រវត្តិសាស្រ្ត។ ក៏ប៉ុន្តែ ដូចដែលសហគមន៍ជាច្រើនបានជួប ពេលដែលអ្នកចាប់ផ្តើមកត់ត្រាឈ្មោះទីកន្លែង និង​ចង់​អង្គុយ​ជជែក​ជាមួយ​ចាស់ព្រឹទ្ធាចារ្យដើម្បីសួរនាំគាត់អំពីទីតាំងទាំងនោះ ការនិទានរឿងក៏ចាប់ផ្តើម។ ពេលនោះ​អ្នកនឹងយល់ថា ឈ្មោះ​របស់​ទីកន្លែង​គ្រាន់តែជាចំណុចចាប់ផ្តើមនៃអ្វីមួយដែលមានវិសាលភាពធំជាងនេះ។