ឧបករណ៍សម្រាប់អ្នកជួយការពារដែនដី៖ របៀបចាប់ផ្តើម
តើអ្វីទៅជាលក្ខណៈពិសេសរបស់ទីកន្លែងដែលអ្នករស់នៅ? តើវាជាទឹកដីដែលអ្នកស្រលាញ់? តាមការប៉ាន់ស្មានរបស់យើង អ្នកមកទីនេះដោយសារតែអ្នកមានបំណងអភិរក្សតំបន់មួយចំនួនដែលមានសារៈសំខាន់សម្រាប់អ្នក។ អ្នកប្រហែលជារស់នៅក្នុងតំបន់ដែលមានទន្លេ ឬក៏មានព្រៃឈើ ដែលគ្រួសាររបស់អ្នកបាននិងកំពុងរស់នៅជាច្រើនជំនាន់មកហើយ។ ហើយជាអកុសល ទឹកដីរបស់អ្នកកំពុងតែប្រឈមនឹងការគម្រាមកំហែងជាបន្តបន្ទាប់។
ពួកយើងបង្កើតឧបករណ៍នេះឡើងដើម្បីជាជំនួយដល់ប្រជាពលរដ្ឋដែលកំពុងតែបំពេញកិច្ចការដ៏សំខាន់ក្នុងបុព្វហេតុការពារភពផែនដី ជាពិសេសអ្នកដែលមានចំណាប់អារម្មណ៍ក្នុងការប្រើប្រាស់ផែនទី ឧបករណ៍សម្រាប់កត់ត្រារឿងនិងតាមដាន ដើម្បីជួយការពារទឹកដីពីទង្វើបំផ្លិចបំផ្លាញបរិស្ថាន។
ទាំងនេះគឺជាសំណួរនិងលំហាត់ផ្សេងៗដែលយើងយល់ថាវាមានសារៈសំខាន់ក្នុងដំណាក់កាលដំបូងនៃការបង្កើតគម្រោងមួយ។
ចាប់ផ្តើមពីចំណុចដែលអ្នកកំពុងឋិតនៅ
តើមានអ្វីធ្វើឲ្យទឹកដី ទន្លេ ភ្នំ ព្រៃឈើរបស់អ្នកមានតម្លៃសម្រាប់អ្នកក្នុងការការពារថែរក្សាពួកវា?
តើអ្វីខ្លះជាការគម្រាមកំហែងខ្លាំងបំផុតចំពោះទឹកដីនិងសហគមន៍របស់អ្នក?
តើអ្នកអាចជជែកជាមួយសមាជិកផ្សេងទៀតនៅក្នុងសហគមន៍របស់អ្នក ដើម្បីពិភាក្សាអំពីសំណួរទាំងអស់នេះ និងកត់ត្រារាល់គំនិតយោបល់របស់ពួកគេបានទេ?
លំហាត់៖ ផែនការជីវិត
លំហាត់ដ៏សាមញ្ញមួយដើម្បីជួយអ្នកក្នុងការចាប់ផ្តើមធ្វើកិច្ចការនេះ ត្រូវបានជម្រុញទឹកចិត្តដោយវិធីសាស្រ្តនៃការធ្វើ "ផែនការជីវិត" (plan de vida) របស់សហគមន៍ជនជាតិដើមនៅក្នុងប្រទេសកូឡុំប៊ី។ វិធីសាស្រ្តនោះផ្តោតទៅលើការយល់ដឹងរបស់មនុស្សគ្រប់ជំនាន់ រួមមាន មនុស្សចាស់ អ្នកធ្វើសេចក្តីសម្រេចចិត្ត និងយុវជន។ វាអាចត្រូវបានធ្វើឡើងជាមួយនិងក្រុមមនុស្សតូចឬធំ ក៏ប៉ុន្តែត្រូវប្រាកដឲ្យមានសម្លេងចម្រុះរួមគ្នា។
យកផ្ទាំងក្រដាសធំៗចំនួនបីសន្លឹក រួចហើយគូសគំនូសព្រាងអំពីទឹកដីរបស់អ្នកនៅលើផ្ទាំងក្រដាសនីមួយៗ។
- សម្រាប់ផែនទីទី១ ចូរសួរសំណួរ៖ តើទឹកដីរបស់អ្នកធ្លាប់មានរូបរាងលក្ខណៈដូចម្តេច? ចូរពិភាក្សា ហើយគូររូបភាពជាមួយគ្នាជាក្រុម។
- សម្រាប់សំណួរទី២ ចូរសួរថា៖ តើបច្ចុប្បន្ននេះទឹកដីរបស់អ្នកមានទម្រង់ដូចម្តេចដែរ? ចូរពិភាក្សា ហើយគូររូបភាពជាមួយគ្នាជាក្រុម។
- សម្រាប់រូបទីបី ចូរសួរសំណួរ៖ តើយើងចង់ឲ្យទឹកដីរបស់យើងមានទម្រង់ដូចម្តេចនៅថ្ងៃស្អែក? ចូរពិភាក្សា ហើយគូររូបភាពជាមួយគ្នាជាក្រុម។
ការធ្វើលំហាត់នេះអាចជួយអ្នកនិងសហគមន៍របស់អ្នក គិតអំពីចំណុចឬទីន្លែងដែលអ្នកចង់ផ្តោតការយកចិត្តទុកដាក់និងថាមពលទៅលើវា។
ការចូលរួម គឺជាគន្លឹះ
ពាក្យដែលអ្នកប្រហែលជាបានស្តាប់លឺច្រើនគឺ ការចូលរួម នេះគឺសំដៅទៅលើគម្រោងទាំងឡាយដែលត្រូវបានបង្កើតឡើងក្នុងក្របខ័ណ្ឌមួយដែលមានចំណែកពីសហគមន៍ទាំងមូល។ ខណៈដែលការធ្វើផែនទីបែបប្រពៃណីមានការចូលរួមតែមនុស្សមួយចំនួនតូចប៉ុណ្ណោះ ការធ្វើផែនទីបែបថ្មីនេះ មានការចូលរួមពីមនុស្សគ្រប់គ្នា(រួមទាំងមនុស្សចាស់និងកូនក្មេង)។ សារៈសំខាន់នៃការចូលរួមនេះធ្វើឲ្យផែនទីមានគុណភាពប្រសើឡើង និងធានាថាវាជាតំណាងឲ្យគំនិតយោបល់ជាច្រើន។ ទិដ្ឋភាពរួមមួយមិនគួរត្រូវបានរៀបរាប់ឬបរិយាយដោយបុគ្គលតែម្នាក់នោះទេ។
សំណួរត្រូវសួរនៅពេលចាប់ផ្តើមធ្វើកិច្ចការ
| អ្វីខ្ល | អ្វីទៅជាគោលដៅរបស់អ្នក? (តើជោគជ័យមានរូបរាងដូចម្តេច?) តើទិន្នន័យអ្វីខ្លះដែលអ្នកត្រូវប្រមូល? តើអ្នកត្រូវការការគាំទ្រអ្វីខ្លះពីខាងក្រៅ? (ឧទាហរ៍ដូចជា ផ្នែកបច្ចេកទេស ហិរញ្ញវត្ថុ វិទ្យាសាស្រ្ត ច្បាប់ ឧបករណ៍ ការបណ្តុះបណ្តាល ។ល។) តើសកម្មភាពអ្វីខ្លះដែលអ្នកត្រូវធ្វើដើម្បីសម្រេចគោលដៅរបស់អ្នក? (ឧទាហរណ៍ដូចជា ការប្រជុំ បណ្តុះបណ្តាល ការងារចុះភូមិ ការប្រមូលទិន្នន័យ ។ល។) |
| នរណា | តើនរណាខ្លះនឹងទទួលរងប៉ះពាល់ពីគម្រោងនេះ? តើនរណាខ្លះនឹងចូលរួមក្នុងគម្រោងនេះ? តើនរណានឹងដឹកនាំគម្រោងនេះ ដើម្បីធ្វើឲ្យគម្រោងដំណើរការទៅដោយរលូន? តើអ្នកមានតួនាទីជាអ្វី? តើនរណាប្រហែលជាអាចជួយគាំទ្រកិច្ចការនេះបាន? (តើអ្នកជាចំណែកមួយនៃអង្គការឬសហព័ន្ធដែលអាចជួយជាពេលវេលាឬធនធានដែរឬទេ?) តើអ្នកចង់ឲ្យក្រុមធ្វើសេចក្តីសម្រេចចិត្តបែបណា? |
| ទីកន្លែងណា | តើគម្រោងនេះនឹងត្រូវបានធ្វើឡើងនៅទីន្លែងណា? តើកត្តាអ្វីខ្លះដែលពាក់ព័ន្ធទៅនឹងទីន្លែងនេះ? ឧទាហរណ៍ដូចជា បរិបទនយោបាយ សកម្មភាពរបស់សហគមន៍ជិតខាង ។ល។ |
| នៅពេលណា | តើអ្នកសង្ឃឹមថានឹងបញ្ចប់គម្រោងនេះនៅពេលណា? (ទោះបីជាបើសិនអ្នកគិតថា នឹងមានការងារធំៗមួយចំនួនដែលនឹងត្រូវធ្វើបន្តក៏ដោយ ក៏វាមានប្រយោជន៍ក្នុងការកំណត់កាលបរិច្ឆេទដើម្បីសម្រេចឲ្យបាននូវគោលដៅជាក់លាក់ និងដើម្បីធានាថាគម្រោងនឹងដំណើរការទៅមុខជានិច្ច) |
| មូលហេតុអ្វី | តើហេតុអ្វីបានជាគម្រោងនេះសំខាន់? តើមានអ្វីកំពុងតែកើតឡើង? |
បច្ចេកវិទ្យា
បើត្រឹមតែបច្ចេកវិទ្យា ដូចជាទូរស័ព្ទដៃ ដ្រូន កុំព្យូទ័រ និងជីភីអេសឧបករណ៍ GPS ប៉ុណ្ណឹងមិនអាចការពារទឹកដីរបស់យើងបានទេ។ អ្វីដែលយើងមើលឃើញគឺ បច្ចេកវិទ្យានឹងមានប្រសិទ្ធិភាពខ្លាំងបំផុតនៅពេលដែលវាត្រូវបានប្រើប្រាស់ជាមួយនឹងរចនាសម្ព័ន្ធដែលមានស្រាប់នៅក្នុងសហគមន៍ ដូចជាកិច្ចសហប្រតិបត្តិការ ឬសកម្មភាពណាមួយ ដែលកំពុងតែកើតឡើង។
បច្ចេកវិទ្យាអាចជួយបាននៅពេលដែល ៖
- អ្នកដឹងថា ការគម្រាមកំហែងណាមួយដែលអ្នកចង់កត់ត្រាទុក ឬទិន្នន័យណាខ្លះដែលអ្នកចង់ប្រមូល។
- អ្នកចង់បង្កើតផលិតផលជាក់លាក់មួយ(ដូចជាផែនទី គេហទំព័រ យុទ្ធនាការតស៊ូមតិ ឬអត្ថបទ) ដែលបច្ចេកវិទ្យាប្រភេទណាមួយអាចជួយអ្នកបង្កើតវាបាន។
បច្ចេកវិទ្យាក៏អាចបង្កើតនូវអ្វីមួយដែលយើងមិនចង់បានដែរ ហើយប្រសិនបើអ្នកកំពុងតែប្រើបច្ចេកវិទ្យាដើម្បីប្រមូលទិន្នន័យព័ត៌មានដែលមានលក្ខណៈរសើប វាមានសារៈសំខាន់ក្នុងការជ្រើសរើសឧបករណ៍ណាមួយដើម្បីជួយសហគមន៍របស់អ្នកគ្រប់គ្រងទិន្នន័យដោយខ្លួនឯងបាន ដើម្បីធានាថាវាមិននាំគ្រោះថ្នាក់មកឲ្យអ្នកឬមនុស្សរបស់អ្នក។
ផលវិជ្ជមានដែលអាចកើតឡើង
- ភ្ជាប់ទំនាក់ទំនងរវាងជំនាន់ខុសៗគ្នានៅក្នុងសហគមន៍។
- បង្កើនការចូលរួមរបស់ពលរដ្ឋវ័យក្មេងក្នុងកិច្ចការពារដែនដី។
- កសាងសហគមន៍តាមរយៈការសិក្សារៀនសូត្រនិងការប្រើប្រាស់ឧបករណ៍ផ្សេងៗជាមួយគ្នា។
- មានវិធីសាស្រ្តដ៏មានឥទ្ធិពលក្នុងការចែករំលែកព័ត៌មានផ្ទៃក្នុងនិងទៅខាងក្រៅ។
ផលប៉ះពាល់អវិជ្ជមានដែលអាចកើតឡើង
- មានការផ្លាស់ប្តូរអំណាចមូលដ្ឋាន ដោយមិនមានគម្រោង
- ការញៀនលេងឧបករណ៍បច្ចេកវិទ្យាឌីជីថលទំនើប អាចបង្ករផលប៉ះពាល់ដល់សម្រាប់សហគមន៍និងបុគ្គល។
- ក្នុងសហគមន៍ដែលពុំសូវស្គាល់បច្ចេកវិទ្យា ការនាំចូលឧបករណ៍ទំនើបអាចបង្កើតភាពតានតឹងផ្នែកសង្គម និងការតម្លើងឫកពារដោយអ្នកដែលអាចប្រើប្រាស់ឧបករណ៍។
- ស្របពេលដែលបណ្តាញសង្គម ដូចជា Facebook, WhatsApp និង Instagram មានប្រយោជន៍សម្រាប់ការផ្សារភ្ជាប់សហគមន៍ផ្សេងៗ វាក៏អាចបង្កគ្រោះថ្នាក់ និងការរំខានដល់ជីវិតបែបប្រពៃណីរបស់សហគមន៍ផងដែរ។
- ការធ្លាក់ចុះនូវតម្លៃនៃតួនាទីរបស់ថ្នាក់ដឹកនាំសហគមន៍និងចំណេះដឹងបែបប្រពៃណីរបស់ពួកគេ។
អ្វីដែលយើងរៀនសូត្របាននៅក្នុងដំណើរការ
- វាមិនជាបញ្ហាអ្វីទេ ប្រសិនបើអ្នកមិនដឹងពិតប្រាកដអំពីអ្វីដែលអ្នកកំពុងតែធ្វើ នៅពេលអ្នកចាប់ផ្តើមអនុវត្ត! តាមបទពិសោធន៍របស់យើង គ្រប់គម្រោងដែលទទួលជោគជ័យគឺមានការវិវត្តទៅតាមពេលវេលារបស់វា។
- អ្វីដែលសំខាន់បំផុតគឺការកសាងទំនុកចិត្ត។
- សប្បាយចិត្តនឹងការងារនោះ!
- គ្មាននរណាម្នាក់ដែលមិនធ្លាប់ធ្វើខុសនោះទេ ដូច្នេះ អ្នកអាចរៀនសូត្របណ្តើរៗនៅពេលកំពុងធ្វើវា។
- រៀនសូត្រពីបទពិសោធន៍របស់សហគមន៍ដទៃ។
Guide: Digital security for earth defenders
